WTC Points Table: શ્રીલંકા અને બાંગ્લાદેશ કરતા પણ નીચે ટીમ ઇન્ડિયા, ઇંગ્લેન્ડ ટોપ પર પહોંચ્યું – world test championship points table updated after leeds test india below bangladesh sri lanka

વર્લ્ડ ટેસ્ટ ચેમ્પિયનશિપની (WTC) સાઇકલમાં ભારત અને ઇંગ્લેન્ડની આ પહેલી ટેસ્ટ મેચ હતી. આ હારથી ટીમ ઇન્ડિયા ચોથા નંબરે પહોંચી ગઈ છે. ઇંગ્લેન્ડ પહેલા નંબરે છે. જ્યારે બાંગ્લાદેશ અને શ્રીલંકાની ટીમ ભારતીય ટીમ કરતા પણ આગળ છે. વર્લ્ડ ટેસ્ટ ચેમ્પિયનશિપ 2025-27 સાઇકલમાં અત્યાર સુધીમાં બે ટેસ્ટ મેચ રમાઈ છે. ભારત પર ઇંગ્લેન્ડની જીત પહેલા બાંગ્લાદેશ અને શ્રીલંકા વચ્ચે રમાયેલી મેચ ડ્રો થઈ હતી.

પોઇન્ટ ટેબલની સ્થિતિ

ઇંગ્લેન્ડના 12 પોઈન્ટ અને જીતની ટકાવારી 100 છે. બાંગ્લાદેશ 33.33 PCT સાથે બીજા નંબરે છે. શ્રીલંકા 33.33 PCT સાથે ત્રીજા નંબરે છે. બીજી બાજુ, ભારતના ખાતામાં 0 પોઇન્ટ અને 0 PCT છે. તે ચોથા નંબરે છે. પાંચ ટીમોની હજુ સુધી એક પણ મેચ રમાઈ નથી. ઓસ્ટ્રેલિયા, ન્યૂઝીલેન્ડ, સાઉથ આફ્રિકા અને વેસ્ટઇન્ડીઝને હજુ પોતાની પહેલી મેચ રમવાની બાકી છે.

બર્મિંઘમમાં ભારતની બીજી ટેસ્ટ

ભારત અને ઇંગ્લેન્ડ વચ્ચે રમાઈ રહેલી પાંચ મેચની સિરીઝમાં બીજી ટેસ્ટ બર્મિંઘમના એજેસ્ટનમાં 2 થી 6 જુલાઈ વચ્ચે રમાશે. છેલ્લી ત્રણ મેચ લોર્ડ્સ (10-14 જુલાઈ), માન્ચેસ્ટર (23-27 જુલાઈ) અને ધ ઓવલ (31 જુલાઈ-4 ઓગસ્ટ)માં રમાશે. ઇંગ્લેન્ડમાં પાંચ ટેસ્ટ બાદ ભારત આ વર્ષના અંતે ઘરેલું મેદાન પર વેસ્ટ ઇન્ડીઝ અને સાઉથ આફ્રિકા સાથે બે બે મેચની સિરીઝ રમશે. વિન્ડીઝ સામેની બે મેચ અમદાવાદ અને દિલ્હીમાં રમાશે. કોલકાતા અને ગુવાહાટીમાં સાઉથ આફ્રિકા સાથે મેચ રમાશે.

ઓસ્ટ્રેલિયા બુધવારે (25 જૂન) ના રોજ વેસ્ટઇન્ડીઝ સામે પોતાના WTC 2025-27 અભિયાનની શરૂઆત કરશે. કાંગારૂ ટીમ ત્રણ મેચની સિરીઝમાં વિન્ડીઝ ટીમનો સામનો કરશે. સિરીઝની પહેલી મેચ 25 થી 29 જૂન દરમિયાન બ્રિજટાઉનના કેન્સિંગ્ટન ઓવલમાં રમાશે.